Nilaza ny loharanom-piarovan'i Ejipta fa mpitsidika Breziliana roa nandeha namakivaky ny Saikinosin'i Sinai Ejipta tamin'ny alahady no nisy naka an-keriny rehefa avy nitsidika monasitera mitokana any an-tendrombohitra.
Noheverina fa Bedouin ireo jiolahy nirongo takalonaina mba hifampiraharaha amin’ny famotsorana ireo voafonja notazonin’ny fanjakana, hoy ny loharanom-baovao.
Araka ny voalazan'ny Reuters, nanakana fiara fitateram-bahoaka nitondra andiana mpizahatany nankany amin'ny Monasiteran'i St. Catherine ireo jiolahy mitam-basy fa ireo vehivavy breziliana roa ihany no nentiny. Nifandray tamin'ireo sheikh Bedouin teo an-toerana ny governemanta mba hanandrana hifampiraharaha amin'ny famotsorana ireo vehivavy, hoy ihany ny loharanom-baovao.
Nanafika tobin'ny polisy ireo foko Bedouin tao Sinai, nanakana ny fidirana tao an-tanàna ary naka takalon'aina mba hanehoana ny tsy fahafaliany amin'izay heveriny ho ratsy fitondran-tena avy any Kairo sy hanery ny famotsorana ireo havana voafonja.
Tamin'ny volana lasa teo, vehivavy Amerikana roa no notazonina tao anatin'ny fakana an-keriny vetivety mandra-pahatongan'ny manampahefana Ejiptiana nifampiraharaha ny famotsorana azy ireo ora vitsivitsy taty aoriana. Mpiasan’ny orinasa sinoa roa ambin’ny folo ihany koa no nisy naka an-keriny tamin’ny volana lasa teo ary navotsotra indray andro taorian’izay.
Bedouin am-polony mitam-piadiana tamin'ity volana ity no nanodidina ny toby iray an'ny tafika mpiaro ny fandriampahalemana iraisam-pirenena tao Sinay nandritra ny valo andro talohan'ny nanafoanany ny fahirano tamin'ny zoma taorian'ny fifampiraharahana tamin'ny tafika Ejiptiana.
Niezaka nanery ny manam-pahefana ejipsianina hamoaka fonja tao am-ponja koa ireo Bedouin ireo.
