Araka ny filazan'ny Minisiteran'ny Atitany Alemana, fiaramanidina mpiady Eurofighter roa no nifandona teny amin'ny rivotra ary avy eo nianjera tany amin'ny fanjakan'i Mecklenburg-Vorpomerania. Notaterin'ny fampahalalam-baovao alemà fa nianjera tao amin'ny faritra onenana ireo fiaramanidina.
Nifandona teny amin'ny rivotra ireo fiaramanidina mpiady an'habakabaka roa alemà tao amin'ny tanàna kelin'i Malchow, 80km miala ny tanànan'i Schwerin any Alemaina.
“Nifandona teny amin’ny habakabaka ilay [jets] Eurofighter ary nianjera avy eo”, hoy ny mpitondra tenin’ny miaramila iray tamin’ny gazetiboky Der Spiegel. Araka ny filazan'ny Minisiteran'ny Fiarovana, ny iray tamin'ireo fiaramanidina dia nianjera tany amin'ny faritra misy ala akaikin'ny tanànan'i Jabel, raha ny iray kosa nianjera 10km, atsimon'ny tanànan'i Nossentiner Huette.
Nianjera tao anaty ala teo akaiky teo ny potipotin’ireo fiaramanidina potika, izay toa niteraka hain-trano. Lahatsary iray navoakan'ny fampielezam-peo iray ao an-toerana dia mampiseho setroka mainty mipoitra eo ambonin'ny ala iray ao amin'ny toerana voalaza fa nianjera. Ny ampahany sasany amin'ny fiaramanidina ihany koa dia nandona ny trano fonenana, hoy ny tatitry ny gazety iray ao an-toerana, SVZ.
Ireo fiaramanidina roa ireo dia anisan'ny Air Force Squadron 73 'Steinhoff,' napetraka tao amin'ny toby Laage akaikin'ny tanànan'i Rostok. Teo am-panaovana sidina fiofanana izy ireo no nitrangan’izany. Voalaza fa nahavita nitsoaka ireo mpanamory ary inoana fa tafavoaka velona tamin’ny zava-nitranga. Tsy mbola nisy ny vaovao azo teny an-toerana hatreto.
Mbola velona ny iray tamin’ireo mpanamory, nanamafy ny minisiteran’ny Fiarovam-pirenena. Ora maro taty aoriana, nilaza ny Tafika An'habakabaka Alemana fa hita faty ilay mpanamory faharoa. Naratra ihany koa ilay mpanamory sisa velona ka nentina teny amin’ny hopitaly, araka ny fanazavan’ny polisy.
Nanamafy ihany koa ny mpitondra tenin'ny Tafika Alemana, ny Bundeswehr, fa nitranga ny zava-nitranga saingy tsy nanome fanazavana fanampiny.
Ny Distrikan'ny Farihy Mecklenburg, toerana nitrangan'ilay loza, dia toerana fialan-tsasatra malaza any Alemaina fantatra amin'ny tahirim-boajanahary.
