Niakatra 12% ny isan'ny mpizaha tany ao Syria tamin'ny taon-dasa raha oharina amin'ny haavon'ny 2008, ary Arabo no isan'ny mpitsidika, hoy ny antontan'isa nataon'ny governemanta.
Syria, izay ahitana toerana manan-danja maro tamin'ny fahagola, anisan'izany ny tanànan'i Palymra fahiny, dia nahazo mpizaha tany manodidina ny enina tapitrisa, anisan'izany ireo Syriana mpila ravinahitra 1.1 tapitrisa sy Arabo 3.6 tapitrisa, tamin'ny 2009, hoy ny fampitam-baovaom-panjakana.
Heverin'ny governemanta ho toy ny mpizahatany avokoa izay vahiny miditra, fomba fanao notsikerain'ireo manampahaizana manokana momba ny indostria ho mamitaka.
Niharan'ny sazy Amerikana nanomboka tamin'ny 2004 i Syria noho ny fanohanany ireo vondrona mpitolona, saingy nihatsara ny fifandraisana amin'ny Tandrefana ary mitady fifanatonana i Washington.
Nandray fepetra hanalalahana ny toekarena ny Antoko Baath eo amin'ny fitondrana taorian'ny am-polony taona maro nisian'ny fanindrahindram-pirenena sy ny fandraràna ny orinasa tsy miankina.
Tao anatin'izay taona vitsy lasa izay dia nisy trano fandraisam-bahiny vaovao naorina, indrindra tao Damaskosy sy Aleppo, saingy vitsy amin'izy ireo no manana kalitao iraisam-pirenena noho ny any Libanona na Jordania mpifanolo-bodirindrina, izay nametraka loharanon-karena bebe kokoa amin'ny fampandrosoana ny sehatry ny fizahantany.
