Sambo mpizahatany iray miaraka amina olona am-polony no nifanehitra tamin'ny sambo iray hafa ary nivadika tamin'ny renirano Danube any Budapest, Hongria.
Nisy olona 34 farafahakeliny tao anaty sambo, isan'izany ny mpandeha sy ny ekipa, tamin'ny fotoana nitrangan'ny loza ny alarobia hariva teo, izay nitranga teo akaikin'ny tranobe parlemantera Hongroà malaza ao afovoan-tanàna.
Tonga eny an-toerana ny ekipa mpamonjy voina, anisan'izany ny sambon'ny mpamono afo. Ny sasany amin'ireo olona dia efa navotana raha mbola mitohy kosa ny fikarohana ny hafa.
Raha ny angom-baovao dia nivadika ilay sambo nantsoina hoe 'Mermaid' rehefa avy nokapohan'ny sambo mpizahatany iray hafa.
Olona fito farafahakeliny no voamarina fa maty an-drano ary 19 no avotra, hoy ny Minisiteran'ny Atitany raha ny fampitam-baovao avy any an-toerana. Mitohy ny fikarohana ireo hafa.
Nilentika ilay sambo taorinan'ny 10 ora alina teo an-toerana, ny mpitondra tenin'ny mpitantana ny sambo dia nilaza tamin'ny vavahadin-tserasera Index, nanamafy fa mpandeha 32 sy mpiasa ekipa 2 no tao anaty «Mermaid» tamin'ny fotoana nitrangan'ny loza.
