TUNIS, Tonizia – Ravan'ny afo ny mausoleum ao Sidi Bou Said, toerana fizahan-tany malaza Toniziana, tamin'izay heverina ho fanafihana fandoroana izay nomelohin'ny filoham-pirenena tamin'ny alahady ho heloka bevava.
"Ity heloka bevava manohitra ny kolontsaintsika sy ny tantarantsika ity dia tsy tokony ho afa-bela," hoy ny fanambaran'ny filoham-pirenena, nanentana ny polisy mba "tsy hitsitsy amin'ny fisamborana ireo olon-dratsy" izay nanapoaka ny mausoleum teo amin'ny sisin'i Tunis ny asabotsy teo.
Nilaza ny mpitondra tenin'ny minisitry ny atitany, Khaled Tarrouche, fa efa nisy ny fanadihadiana natao mba “hamatarana raha lozam-pifamoivoizana na fandikan-dalàna azo ampangaina”.
Maromaro ny toerana masina natokana ho an'ireo olo-masina Miozolomana nodorana na norobaina tato anatin'ny volana vitsivitsy tao Tonizia, tamin'ny hetsika iampangana ireo Salafista henjana izay tsy mandefitra amin'ny olo-masina na ny toerana masina.
Vondrona Salafista no nosamborina tamin'ny fiandohan'ny volana Desambra taorian'ny firehetana mitovitovy amin'izany tao amin'ny fitoerana masina Sufi ao Zaouia Saida Manoubia ao Tunis.
Ireo Salafista, izay tombanana ho eo anelanelan'ny 3,000 ka hatramin'ny 10,000 ny isan'izy ireo ao Tonizia, dia voampanga ho nikarakara andianà fanafihana mahery vaika hatramin'ny nanonganan'ny revolisiona an'i Zine El Abidine Ben Ali roa taona lasa izay.
Ahiana ho tompon'antoka tamin'ny fanafihana ny masoivohon'i Etazonia ao Tunis ny 14 septambra ho fanoherana ny sarimihetsika manohitra ny finoana silamo novokarina tany Etazonia izy ireo. Olona efatra no namoy ny ainy vokatry ny fifandonana tamin’ny mpitandro ny filaminana.
Ny tanànan'i Sidi Bou Said an-tampon-kavoana, nomena ny anaran'ny mausoleum, any ivelan'i Tunis dia toerana fizahan-tany malaza fantatra amin'ny arabe tery sy trano nentim-paharazana misy varavarana manga.
