Araka ny filazan'i Abdul Muhari, mpitondra tenin'ny Sampan-draharaham-pirenena misahana ny loza voajanahary (BNPB) Indonezia, dia nanambara ny fanjakana hamehana ny fitantanan'ny distrikan'i Flores Atsinanana ao amin'ny faritanin'i Nusa Tenggara Atsinanana taorian'ny fiakaran'ny tendrombohitra Lewotobi Laki-Laki ho amin'ny sokajy avo indrindra tamin'ny zoma.
Ny Foiben'ny Volkanolojia sy ny Fampihenana ny Loza ara-jeolojika dia nanamarika ny firongatry ny asan'ny volkano nanomboka ny 13 martsa ka hatramin'ny 20 martsa, miavaka amin'ny fitomboan'ny horohoron-tany volkano sy ny fiposahan'ny tsanganana fipoahana. Nisy fipoahana lehibe nitranga tamin'ny 23:56 ora teo an-toerana ny alakamisy, ka nahatratra 8,000 metatra ny haavon'ny lavenona eo ambonin'ny tampony, manodidina ny 9,584 metatra ambonin'ny haabon'ny ranomasina.
Nanelingelina ny fivezivezen'ny fiaramanidina ity fipoahana ity, ka niteraka fanafoanana sidina iraisam-pirenena maro. Araka ny filazan'ny mpitantana ny seranam-piaramanidina I Gusti Ngurah Rai any Bali, sidina iraisam-pirenena fito no nofoanana teo anelanelan'ny 09:45 sy 16:00 ora teo an-toerana ny zoma. Ankoatr'izay, sidina iraisam-pirenena dimy no niatrika fahatarana, na dia mbola tsy nisy fiantraikany tamin'ny fanafoanana aza ny sidina an-trano.
“Ho fepetra fiandrasana, nanambara ny sata vonjy maika amin'ny fipoahan'ny Tendrombohitra Lewotobi Laki-Laki ny governemantan'ny Faritra Atsinanana Flores, izay manankery mandritra ny 14 andro manomboka ny 20 martsa ka hatramin'ny 2 aprily”, hoy ny fanambarana ofisialy nataon'ny masoivoho nasionaly misahana ny loza voajanahary any Indonezia.
Olona 389 no nafindra toerana tamin'ny alarobia tamin'ny tanàna atahorana ho tratran'ny fipoahana, hoy izy. Araka ny angon-drakitra BNPB, manodidina ny 4,000 ny mponina nafindra toerana hatramin'ny fipoahana voalohany tamin'ny 4 Novambra 2024.
Araka ny tatitry ny sampan-draharaham-paritany misahana ny loza sy ny fanalefahana ny loza, mahatratra 4,796 ny isan’ny olona nafindra toerana tao amin’io kaominina io.
Nanentana ny vahoaka ny BNPB mba ho tony sy hisoroka ny vaovao diso momba ny fipoahana. Ireo mponina ao anatin’ny 7 km miala amin’ilay volkano, sy ireo ao anatin’ny 8 km any amin’ny faritra atsimo andrefana sy avaratra atsinanana, dia nasaina nitsoaka avy hatrany. Nampitandrina ihany koa ny BNPB momba ny mety hisian'ny tondra-drano avy amin'ny volkano entin'ny rano rehefa avy ny orana.
