Nandroso bebe kokoa ny fifandraisana teo amin'i Thailand sy Arabia Saodita tamin'ny fanaovan-tsonia vao haingana ny Memorandum of Cooperation teo amin'ireo andrim-panjakana roa malaza natokana ho an'ny kolontsaina, tantara ary lova ao amin'ny firenena roa tonta. Ity fifanarahana ity dia antenaina hanamafisana ny fitomboan'ny Alliance of civilizations isan-karazany eo amin'ireo fanjakana Bodista sy Islamika roa manan-danja, taorian'ny fampihavanana diplaomatika tamin'ny Janoary 2022.
Natsangana tamin'ny 3 Febroary 2025 ny Memorandum of Cooperation mba hampiroboroboana ny fifanakalozana fahalalana sy fikarohana eo amin'ny sehatry ny tantara, ny fikajiana ny vakoka ary ny zavakanto. Ity fifanarahana ity dia nosoniavina teo amin'ny The Siam Society, andrim-panjakana ara-kolontsaina malaza ao Thailandy, ary ny King Abdulaziz Foundation for Research and Archives (DARAH) ao Arabia Saodita. Ny fanaovan-tsonia dia notarihin-dRamatoa Bilaibhan Sampatisiri, Filohan'ny Fikambanana Siam, sy Atoa Turki bin Mohammed Alshuwaier, Lehiben'ny Mpanatanteraka ao amin'ny DARAH.
Taorian'ny lanonana fanaovan-tsonia dia nanana fahafahana nitety ny Tranombokin'ny Fikambanana Siam sy ny fanangonana boky tsy fahita firy Atoa Turki, izay nandihany ireo loharanon-karena sy antontan-taratasy tsy fahita firy mikasika ny zavakanto sy ny tantaran'ny Saikinosy Arabo sy Siam izay voatahiry ao anatin'ny tranomboky.
Niaraka taminy tamin’ity fitsidihana ity Atoa Abdulrahman Abdulaziz Alsuhaibani, Masoivoho Saodiana any Thailandy; Andriamatoa Humid Abdulrahman H. Al Humid, Talen'ny diplaomasia ho an'ny daholobe ao amin'ny Minisiteran'ny Raharaham-bahiny Saodiana; Ramatoa Somlak Charoenpot, Filoha lefitry ny Fikambanana Siam; Khun Kanitha Kasina-Ubol, Tale Mpanatanteraka ao amin'ny The Siam Society; Mpikambana ao amin’ny filankevitra; ary tompon’andraikitra avy ao amin’ny DARAH.
Ity fitsidihan'i Mr. Turki ity dia nitranga herintaona mahery taorian'ny nanaovan'ireo mpikambana ao amin'ny The Siam Society ny fitetezam-paritra voalohany nataony tany Arabia Saodita tamin'ny Febroary 2024, izay nitsidihany ny tranoben'ny DARAH tao Riyadh.
Tamin'ny fanambarana nozaraina tao amin'ny pejy Facebook-ny, ny Siam Society dia nampita ny hetahetany fa ireo fihaonana ireo dia hitarika amin'ny fampiasàna ny loharanon-kevitra sy ny fampahalalam-baovao, izay manana fahafahana lehibe hamokatra fahatakarana sy hevi-baovao ho tombontsoan'ny fikambanana roa tonta.
Noraisin-dRamatoa Bilaibhan tao amin'ny Trano Lova Nai Lert Park ihany koa Atoa Turki sy ny delegasionany. Fanampin'izany, nitsidika ny tranokalan'ny UNESCO an'i Ayutthaya sy ny Central Storage an'ny National Museums, Departemantan'ny Zavakanto Tsara izy ireo.
Taorian'ny famahana ny fifandirana ara-diplaomatika naharitra 32 taona teo amin'ny fanjakana roa tamin'ny Janoary 2022, dia nisy fitomboana lehibe teo amin'ny varotra, fizahan-tany ary fifandraisana ara-barotra. Nitombo ny isan'ny mpitsidika Saodiana any Thailand. Taranaka vaovaon'ny tanora mpandraharaha Thai, nokarakaraina teo ambanin'ny Thai-Muslim Trade Association, dia nandray anjara mavitrika tamin'ny fampirantiana ara-barotra Saodiana isan-karazany ary nandray anjara tamin'ny fitsangatsanganana fanao mahazatra any amin'ireo toerana fizahan-tany malaza any Arabia Saodita.
Na izany aza, ny fifanakalozana ara-kolontsaina dia mbola tsy nivoatra. Ny fiaraha-miasa eo amin'ny Siam Society sy ny DARAH dia antenaina fa hanana anjara toerana lehibe amin'ny famahana ity hantsana ity sy hanatsara ny fifandraisana ilaina eo amin'ny sehatry ny akademika sy ny fikarohana.
