Farafahakeliny olona 13 no maty ary 70 mahery no naratra noho ny tafio-drivotra mahery vaika nandrava an'i Moskoa.
“Nahafaty olona 11 ny tafiotra ary 70 hafa naratra mafy”, hoy ny ben'ny tanànan'i Moskoa Sergei Sobyanin tamin'ny alatsinainy. “Efa mahazo fikarakarana araka ny tokony ho izy ireo niharam-boina”, hoy ihany izy.
Taorian'ny fanambarana dia voamarina ny fahafatesan'olona roa; Tovovavy iray 11 taona maty tsy tra-drano no nianjera taminy, ary lehilahy iray 57 taona no maty voafaokan’ny fefy nentin’ny rivotra.
Araka ny vaovao voaray, dia vokatry ny fianjeran’ny hazo na ny tranobe ny ankamaroan’ireo namoy ny ainy, anisan’izany ny fiantsonan’ny fiara fitateram-bahoaka.
Nandritra ny fiaraha-miory tamin'ireo niharam-boina sy ny fianakaviany, dia nanamarika i Sobyanin fa “tsy mbola nisy toy izany” ny fisehoan-javatra toy izany. “Noho ny fandalovan’ny rivo-doza tamin’ny mitataovovonan’ny andro ka izay no mahatonga ireo traboina maro be”, hoy ihany izy.
Voatery nanafoana sidina 13 teo ho eo ny seranam-piaramanidina Domodedovo sy Sheremetyevo ao Moskoa ary nihemotra 33 hafa noho ny toetr'andro ratsy.
Nanambara ny sampan-draharahan'ny toetr'andro ao Rosia fa nahatratra 22 metatra isan-tsegondra ny hafainganam-pandehan'ny rivotra nandritra ny rivo-doza, ary nampitandrina ihany koa izy fa nisy tafio-drivotra faharoa namely ny renivohitra Rosiana nandritra ny alina.
