Fiji dia nanao sonia fifanarahana momba ny serivisy an'habakabaka miaraka amin'i Hong Kong, izay antenaina fa ho fampiroboroboana ny fizahantany sy ny fampandrosoana ara-toekarena.
Araka ny filazan'ny tranokalam-baovaon'ny governemanta Hong Kong, nanao sonia fifanarahana momba ny serivisy an'habakabaka niaraka tamin'ny Minisitry ny Raharaham-bahiny Fidjiana Inoke Kubuabola ny Sekretera misahana ny Fitaterana & Trano Eva Cheng androany.
Nolazainy fa ny fifanarahana no faha-61 amin'ny karazany manome rafitra ara-dalàna amin'ny fametrahana ny fifandraisan'ny rivotra eo amin'ireo toerana roa ireo.
“Tombontsoa ho antsika ny fametrahana fifandraisana an-habakabaka mivantana eo amin'ireo toerana roa ireo. Ny fanaovan-tsonia ny fifanarahana dia mifanaraka amin'ny politikan'ny fanalalahana mandroso amin'ny serivisy an'habakabaka eo amin'i Hong Kong sy ireo mpiara-miombon'antoka amin'ny sidina," hoy i Cheng.
Andrasana hanao ny sidina voalohany ho any Hong Kong ny mpitatitra sainam-pirenena Fiji Air Pacific amin'ny 17 amin'ity volana ity miaraka amin'ireo tompon'andraikitra ao amin'ny Governemanta.
Ao anatin'ny fanantenana momba ny fifandraisana an-kalamanjana amin'i Azia, misy ny tahotra fa ny fidirana ao Hong Kong dia hampitombo ny mahasarika an'i Fiji ho ivon'ny fanondranana olona sy fivarotan-tena.
Ny talen'ny fifindra-monina teo aloha Viliame Naupoto dia nilaza tamin'ny seha-pifanakalozan-draharaha tamin'ny herinandro lasa fa ilaina ny governemanta hijery tsara ny fitantanana ny fifindra-monina.
Nilaza izy fa amin'ny maha-ivon'ny seranan-tsambo azy, dia mihamaro ihany koa i Fiji ampiasain'ny rongony sy ny fivarotan-tena mba hanondrana an-tsokosoko ireo mpivaro-tena any Azia ho an'ny mpiasan'ny sambo mpanjono an-jatony mandady ny ranon'i Pasifika ary tonga any Fiji mba hameno lasantsy sy hameno entana.
