Tsy nankasitraka ny fanapahan-kevitry ny governemanta hamela an'i Google hanidina balaonina Aterineto manerana an'i Oganda ny Ogandà Internal Security Organization (ISO), noho ny olana momba ny fiarovana.

Loon LLC, ny sampana Alphabet izay mampiasa balaonina stratosferika mba hanomezana Internet finday ho an'ny faritra lavitra, ny alatsinainy 9 desambra, dia nanao sonia taratasy fifanarahana tamin'ny Ogandà Civil Aviation Authority (UCCA) mba hanidina ambonin'ny lanitra Ogandà.

Saingy nivoady hanakana ny fifanarahana ny Talen'ny ISO Col. Frank Kaka Bagyenda, nilaza fa nahazo vaovao izy ireo fa fomba iray tian'ny firenena vahiny hitsikilo an'i Ogandà sy hanakorontana izany.

Nanohana ny tetikasa ny Filoha Museveni talohan'ny nitarihany ireo sampan-draharaham-panjakana tompon'andraikitra ao anatin'izany ny Minisiteran'ny TIC, ny Minisiteran'ny Fitaterana sy ny Asa, ary ny lehiben'ny tafika mba hahazoana antoka fa manomboka miasa ao Ogandà i Loon.

Saingy nilaza ny Kol. Kaka fa diso hevitra ny filoha, ary hitady fihaonana aminy izy ireo mba hanakanana ny fifanarahana.

Nitanisa zava-nitranga tany Ejipta ny Talen'ny ISO izay nankatoavina ny fifanarahana amin'ny Internet toy izany talohan'ny nahatonga izany ho amin'ny anarana hoe lohataona Arabo izay namarana ny fitondran'ny filoha Hosni Mubarak. Taorian'ny fitondrana tsy refesi-mandidy nandritra ny telopolo taona tao Ejipta, olona an'arivony no nivory tao amin'ny kianja Tahrir ao Kairo mba haneho firaisankina sy hanoritra lalana vaovao. Nampiato ny orinasam-pifandraisan-davitra tao amin'ny faritra ny governemanta mba hanapaka ny fidirana amin'ny aterineto, manelingelina ny zon'ny Ejiptiana hikaroka, handray ary hampita vaovao. Naharitra dimy andro ny fanakatonana ny Aterineto, saingy ny tantara dia manondro an'arivony mihetsiketsika amin'ny alalan'ny Internet maimaim-poana.

Tsy mety amin'ny fizahantany sy ny fiarovana ny firenena ho an'ny mpandeha izany.

Na izany aza, ny mpitondra tenin'ny Fiarovana sy ny tafika, Brig. Richard Karemire, dia nilaza fa ny fifanarahana amin'ny Internet dia nankatoavin'ny Lehiben'ny Herim-piarovana, Jeneraly David Muhoozi, ary tsy mahita ny tsy mety izy ireo.

Saingy nanizingizina ny Kolonely Kaka fa tsy ny sampan-draharaham-piarovana rehetra no nidinika momba ity raharaha ity, izay mety hanimba ny filaminan'ny firenena.

Na izany aza, nilaza ny tale jeneralin'ny UCCA, David Kakuba, talohan'ny fanaovan-tsonia ny fifanarahana, Loon LCC dia nanao fitsarana tany amin'ny firenena samihafa any Afrika, anisan'izany i Ogandà, nandritra ny taona vitsy lasa. Nilaza izy fa nahomby avokoa ny fitsapana rehetra niafara tamin'ny fanaovan-tsonia ny taratasy fifanarahana tamin'i Ogandà mba hanamora ny sidina tsy tapaka ny balaonina Loon mankany Kenya.

Nanatri-maso ny fanaovan-tsonia ny taratasy fifanarahana tao amin'ny Serena Hotel ao Kampala ny masoivohon'i Etazonia ao Oganda, HE Deborah Malac, ary ny minisitry ny asam-panjakana misahana ny asa sy ny fitaterana, Aggrey Bagiire, (hatramin'ny nifindrana tao amin'ny minisiteran'ny Fambolena) tao amin'ny Serena Hotel ao Kampala izay nanao sonia ny Dr. Kakuba sy Dr. Anna Prouse, Lehiben'ny Fifandraisan'ny Governemanta ao amin'ny Loon LLC.